Sielskerwe glo hierdie besoeke
van die dooies aan ons,
vertel ek vir my digtersvriend
vanoggend ná ‘n droom
oor geliefdes en dooies
roepend na ons.
Sedert die mees onlangse
vertrekkende roep ‘n swart kraai
voor my venster nie in Venesië nie.
Verbeelding of fausse reconnaissance?
Op die beginsel van cui prodest
is ons almal skuldig
aan verlange en fantasie
en weier ons om die dooies
‘n ruskans te gun.
Ek het die sleutel toegesluit
in die kluis waar jy rus,
Monsieur Joyeux,
sibariet, skeptikus, regsman:
met hierdie vers bewys
ek jou tog verkeerd oor
die Anderkant.
© Joan Hambidge